25. let obahajanja

Autor slika: Roni Brmalj

Autor: Nikola Cvjetović - Torpedo media
Četvrt stoljeća Grobnički dondolaši proslavili uz dokumentarni film "25 let obahajanja"
Na svečanosti su dodjeljenje i zahvalnice za "25 let staža va dondolaših", a primili su ih Nikola Vrančić, Saša Jovandić, Darko Radetić, Davor Gržetić, Aljoša Žeželić, Zoran Manjgotić, Frenki Fućak i Danijel Juretić.

Čavle - Grobnički dondolaši proslavili su četvrt stoljeća premijerom filma "25 let obahajanja". Film je nastao u produkciji Creative Medije, a govori o 25 godina "zvonjav, humanitarnih akcij, putovanjih, smiha, prijateljstva, čuda lipih pa i ka manje lipa stvar ka je stala va to vrime". Za priču i scenarij bio je zadužen Fabijan Černeka, kamerama su sve bilježili Siniša Barčić, Vanja Perić i Krešimir Černeka. Novinarski

dio posla odradili su Alen Haramija i Fabijan Černeka, a za glazbeni dio filma zaslužni su Rudolf Srića i Nenad Ban. Narator filma bio je Robert Reljac, a redatelj Krešimir Černeka. Film je u potpunosti ispričan na čakavskom narječju, a tekst je pregledala Sanja Zubčić iz Katedre Čakavskog sabora Grobnišćine.

Na svečanoj sjednici održanoj u Domu kulture Čavle, povodom četvrt stoljeća postojanja udruge, brojnim nazočnima obratio se predsjednik udruge Grobničkih dondolaša.

- 25 let Grobničkih dondolaših, kuliko j samo zvonjav, humanitarnih akcij, putovanjih, smiha, prijateljstva, čuda lipih pa i ka manje lipa stvar more stat va to vrime. Fanj put su dečki ćakulali o ten kako in je bilo kad je njih 10-tak krenulo, oprtili su se najboje kako su onput znali, ni ne znajuć će ih ki dočekat, ali su krenuli, i vaje počeli prenašat na onega ki je za njimi došal va udrugu, svoju viziju kako bi to rabilo zgedat, kako se ponašat, ne samo prema pajdašu skin zvoniš, leh prema simi ki su snami kad obahajamo ali i kako se ponašat prema našoj Grobnišćini. Hvala Van ča ste ustrajali kad su vas podsmih gedali, i ča ste dopejali udrugu tu kadi j danas. Z leta va leto mladići su dohajali oćutit nič ča je naš Duško videl kad je malo ki mogal to ni zamislet. Tako san i sam postal dondolaš, osjetivši da bin morda mogal i ja dat jedan svoj mali del kako bimo zajedno simi bili na ponos, i kad
obahajamo naša sela i kad remo va svit, prenašajuć na mlaji svoju jubav prema kraju ki tej zgojil i prema našimi starimi ki su nan pušćali ove navade. Čuda ih je potla došlo. Mićerih dondolaših je ko nekad velih, a velimi je kadigod postalo i tesno delat kolo. Zvonci zvone i ruše, pot ti klizi čez hrbat, noge maste prema tvojen selu, a dih ovčje kože se sakud čuje. Judi nas dočekuju, kapo šviče, obleće oko nas, zastava se vrti, pod krabujun zijamo... Kakov je to samo blagdan za sakoga ki je se j oprtil!

Va 25 let nismo imeli prilike načinit jedan kvalitetni audio-vizualni arhiv, skin moremo promovirat udrugu i Grobnišćinu kamo god dojdemo. Niki judi nas od početka prate, pa nan je bilo bitno zabilježit kako nas oni sad vide i ča misle o nami. Materijala ima čuda, i dobit ćemo ga na korištenje za naš daljnji rad. Na početku je bilo dogovoreno trajanje filma od 15 min,a da smo stavili se ča smo teli bil bi to serijal a la televisa presenta. Ovin puten se od srca zahvaljujen Fabijanu, Krešimiru i Siniši, odnosno ekipi Creative media na suradnji va ovon projektu i izradi ovega dokumenta, kako mi na to gedamo.

Izjave ke je ekipa Creative medie skupjala, san imel prilike poslušat, i čuda put mij oko zasuzilo, jer smo videli kuliko nas štimate i kuliko Van je drago kada Van dojdemo va selo, ča nami daje obavezu ku nećemo sigurno zatrt. Lipe, teple, ponosne i iskrene besede ke ste rekli, a gedajuć va vaše oči, va vašu dušu, daju nan kuraja da još više delamo, rastemo va novih projektih, i održavamo nivo na kon smo danas. Smatran da ste si vi ki nas dočekujete kad zvonimo, ki nas podržavate za vrime i van mesopusta, del naše užance dondolanja i hvala Van na vašoj bezrezervnoj podršci. Verujen da će dica, pogotovo mićeri dondolaši upijat se rečeno i viđeno aš od njih očekujemo da oni dojdu danas-jutra, na naše mesto. Potrudit ćemo se film plasirat va naši vrtići i škole, kod svojevrsnu lektiru, da dica od mićih nog znaju kakova je mesopusna užanca na Grobnišćini. Ali ni ih bitno samo upoznat z dondolaši, leh je na simi nami obaveza da tu tradiciju usvoje, i da ono ča sej spasilo pred 25 let, ne bude ugroženo za 25, 50 let... Da znaju da bivaju va najlipjen kušćiću svita, pa i ako ne more bit dondolaš, morda će bit najveći majstor za zvonac načinit, Zdene nedamo ti mira još baren 25 let – ne veseli se. Morda će rabit pomoć drocat velu palentu, načinit karet za balinjeradu, kantat va zboru, sost armoniku na spomen Valiću i još čuda lipih stvarih imamo ke su nan na ponos. Va semu temu su i sad dondolaši, i tu se vidi kuliko su dondolaši odrasli noseć Grobniščinu na srcu, i da to ni leh prvih misec-dva va letu.

Zahvaljujen se se Katedri čakavskog sabora Grobnišćine, ča nan je pomogla lektorirat tekst kako bi naš Robert Reljac mogal kod narator upotpunit ovaj vizual. Simi sponzori hvala ča su nan pomogli, da uspijemo realizirat ovaj projekt. Vidite da su sredstva utrošena na pravu stvar, i nadamo se da Van je drago ča ste del ove naše štorije. Hvala Marijani Šimac ča nan je ustupila svoju pjesmu, ku je naš dondolaš Erik tako srdačno zrecitiral. Bravo Erik. Nemoren preskočit zahvalu, Mješoviton pjevačkon zboru Castrum, ča su nan obogatili večerašnji program, i ča na jedan poseban način čuvaju versi kih si znamo i kisti se ne sme pozabit. Još će nan oni jednu odkantat večeras. Na kraju, ne i najmanje bitno, želin se zahvalit njoj ka nan je dala se. Se lipote srcu drage. Šnjun smo proživeli mladost, a nadan se da ćemo bit i va dubokoj starosti, našoj vječitoj inspiraciji. Va dondolaših ćeš vavik imet jubav ka ti rabi. Grobnišćino, Hvala ti!, rekao je to predsjednik Udruge Grobnički dondolaši Alen Haramija na svečanoj sjednici održanoj u Domu kulture Čavle, povodom četvrt stoljeća postojanja udruge.

Na svečanosti su dodjeljenje i zahvalnice za "25 let staža va dondolaših", a primili su ih Nikola Vrančić, Saša Jovandić, Darko Radetić, Davor Gržetić, Aljoša Žeželić, Zoran Manjgotić, Frenki Fućak i Danijel Juretić.