Napisao Aljoša Žeželić
POVJEST DONDOLANJA
Naši judi su se znali organizirat i poć z blagon va goru, da bi bar nič očuvali od zla ko j zadesilo Grobnišćinu. Živeli su z blagon va šumi i čuvali ga od sih nedać, a to nisu bili samo vanjski barbari, bile su to i dive životinje, kod ča su vuki, medvidi, risi, kih je va ono doba bila puna šuma. To j bila vela borba za preživjavanji kako blaga tako i judih. Va toj su se borbi judi obučevali tako da ča strašnije zgjedaju. Kod klobuk su stavjali kakovu glavu od blaga (brava ili krave) a to se sad zove KRABUJA, črnili su se po obrazu z popelon, v ruki su nosili kakov kolac, koren, sikiru, staru košćinu, palentar, škrebetalnicu. To se danas zove ŽUNTA, magari to na nikih dijalektih znači mišić, a pu nas se pak zna reć pu mesara “daj mi malo za juhu i za žuntu jednu kost”, to bi bilo kod jedan dodatak ili nič priko mire. Na hrbat su stavjali ono ča su imeli, a to j koža od ovce a na sebe bi obiševali se čaj rušilo, kod ča su lonci, metalne late, dondole.
Pobigli su barbari i šumsko blago
Tako obučeni i parićani hodili su po cele noći, kad se je najdaje čulo, tako da je šumsko divo blago pobiglo čin daje od toga, a da ne govorimo da se j i tin stranin barbaron ledila krv va žilah od straha. Po danu njin ni na kraj pameti ni bilo poć va goru ukrast ku ovcu.
Dondolaši su živeli va gori z blagon, a kad bi se spušćali, judi su se jih, a pogotovo dica, jako bali, aš su jako grdo zgjedali i jako rušili, ali isto tako kad su jih čuli znali su da dohaja proleći i da će se počet rast i cvast. Tako da su oni bili i najavjivači lipših dan i bojega živjenja.
Desetak dondolaša zaslužno za to ča se užanca ni zatrla
Pedesetih let 20 st. to zanimanji za domaće blago j pomalo nestajalo, aš se j na Grobnišćini iskorišćavala šuma i prodavala su se drva po celon svitu, kod jedna kvalitetna građa, tako da su pomalo nestajale vele šume. Divo blago se j valda na prsti moglo pobrojit, a ovac je taman tuliko da se napravi sira za domaći judi, aš ni postojala nika ozbilnija proizvodnja.
Ondašnja politika isto to ni podržavala, aš su se bali judih ki nisu bacilali za zakoni ki su onda vredili i da ni bilo dondolaših kod ča su pokojni Franjo Margetić-Lalić, pokojni Vazmoslav Vlah-Paškvanić, pokojni Ivan Rak-Diža, Miro Perušić, pokojni Vazmoslav Fućak-Vazme, Zvonko Haramija, pokojni Delimir Margetić-Zebić, Ranko Čabrijan-Pančo i pokojni Marinko Jović-Frk običaj dondolanja na Grobnišćini bi se bil zgubil. Ovun prilikun njin se zahvajujen ča nisu popustili i ča su pedeset let dondolali kad to ni bilo jako društveno prihvatjivo. Ako se ki domišja još judih ki su š njimi dondolali, neka se javi, tako da proširimo popis pravih dondolaših.
Tako nikako dohajamo do 1996. –1997. leta, kad san počel šetat po Liburniji i gjedat ča i kako drugi zvončari delaju. Ono vrime djelovali smo va udrugi Čavjanske maškare ka j imela jako zapažene tematske maske kod ča su: Grobnički Vinetu, Grobnički Tatari, Grobnička Republika, Karolina Riječka i dobar del judih va udrugi j prihvatil ideju da krenemo z jednun izvorno tradicionalnun maskun Grobnički dondolaši.
Grobnički kapric- danas imamo priko sto članih
1999. leta okupilo se je nas dvajsetak entuzijastih i krenulo najprvo va istraživanje po Grobnišćini. Povedali smo z starimi judi ki su ča znali o ton. Došli smo do zakjučka da ondašnji dondolaši nisu imeli kod danas si iste brageše ni majice, leh da su obučevali staru strošenu robu poznopak i da su se stavjali na se, se do čega su mogli doć, aš je bila vela neimašćina i teško se je živelo. Čekalo nas je velo delo, napravili smo celu koreografiju, (i šli ju vježbat na Poje) napravili smo idejnu skicu maske i krenuli va nabavu dondolih, ovčjih kož, glav od brava i krav.
Judi su nas po Grobnišćini samo čudno gjedali i slegali z rameni, no mi smo imeli tako velu voju da se opće nismo obazirali na oni ki nan se smiju. Imeli smo jasan cij-obnavjanji i održanji staroga običaja Grobnišćine. Na Riječkon karnevalu 2000.leta nas je bilo dvajsetak, ali smo po celon Korzu zazvonili kod da nas je sto.
Bilo je sakakovih komentarih, od Bili ste odlični samo tako nastavite pa do Ni to za vas, pustite se toga. Ti su tek napravili grobnički kapric i sin za inat smo rekli. To j to i morat ćete se naučit na nas. Danas je Udruga grobničkih dondolaših najmnogobrojnija i najaktivnija udruga maškar na Grobnišćini. Ima priko sto članih. Od toga dice do 16 let imamo dvajsetak, a od ovoga leta moru bit člani i ženske. Magari ne smiju zvonit, moren reć da je zanimanja.
Va ovih letih našega djelovanja moren reć da smo puno toga proputovali. Bili smo na gostovanju va Poljskoj, Danskoj, Austriji, Italiji, Sloveniji, Makedoniji, Crnoj Gori, Bugarskoj a po Hrvatskoj i ovih naših krajih da i ne govorin. Na sih tih gostovanjih more se reć da smo jako lipo dočekani i da smo se pokazali kod dobri promotori naše Grobnišćine.
Dondolaši već va Europi - članovi Europske udruge karnevalskih gradova
Kod ča vidite jako smo aktivni i to ne samo po zimi leh stalno gremo i na letnji karnevali. Aktivni smo člani i Europske udruge karnevalskih gradova. Već više let zaredon uspješno va domu na Čavji držimo tanci po soboti, organizirano se javjamo Crvenon križu za davanji krvi, više smo put do sad dali donacije za Dom umirovljenika i za obiteji ke nimaju nikakova primanja, a surađujemo i z simi udrugami na Grobnišćini.
I ča da van još rečen leh to da smo va vrlo kratko vrime napravili jedan ozbijan prepoznatjiv brand za Grobnišćinu. Nonići, nonice, oci, matere, žene, pretrpeli ste jako puno s nami i zato se sin zahvajujen, pogotovo juden ki nas sako let va sakon selu dočekaju kod da dohajaju kraji. I još jedno velo hvala našen DVD-u Čavja i Općini Čavja aš bez sih tih dragih judih ni nas ne bi bilo.
Zato ja vavik govorin sagdi smo bili, sega smo videli, ma j nalipše pozvonit po našoj Grobnišćini.
ŽIVIO MESOPUST !